الماضي لو ماتعالجش فعلًا بيسبب لنا مشاكل في الحاضر و بيوقفنا في مكاننا.
عندنا نوعين من الناس و هما بيتعاملوا مع الماضي..
- في ناس بتتعامل مع الماضي وبتقف عنده. بتفتكر دايمًا المشاعر المؤلمة و المواقف و بتقفل علي نفسها ممكن تنسحب عن الدنيا كلها.. تفضل متألمة طول الوقت .. و ده نوع كتير من الناس بيتعاملوا مع الماضي بالشكل ده.
- قليل من الناس اللي بيحاول يتعلم من الماضي وياأخذه من الدروس اللي اتعلمها في الحياة و بيكمل حياته بعد كده.
علشان نتعامل مع الماضي لازم نحط في دماغنا مجموعة من القواعد..
- الماضي وهم..!
الماضي وهم لإن هو مش موجود الماضي حصل خلاص .. طيب ولية أنا بتضايق و ليه أحس بمشاعر مؤلمة ؟
علشان أنا دايمًا بفتكر الماضي وهو دايمًا في دماغي مانتهاش هو دايمًا قدام عنيا دايمًا بفتكر الموقف و كأنه حصل أمبارح مش من 20 – 30 سنة.
كتير من الناس بتقولي أنا بفتكر موقف من وأنا عندي 3-4 سنين و أنا مش قادر انساها أنا كل يوم بفتكر الموقف ده وبيخليني في مشاعر حزينة و بتأثر جدًا و ده بيسحب مني طاقة كبيرة.
فأعرف إن الماضي وهم خلاص أنتهي اللي بيخلينا نتألم إن أحنا بنفتكر الموقف يوم بعد و يوم.
- الماضي عمره ما يتعالج لوحده..!
لازم أنت تعمل مجموعة من الخطوات أو تروح لحد متخصص يساعدك لو كانت المشكلة او الصدمة شديدة جدًا و متكررة فبتحتاج حد يساعدك. لأن وأنت قاعد قدامي في جلسة ببقى عارف تفاصيل كتير عن حياتك ببقي عارف أيه الداخلة أيه التقنية اللي هاستخدمها معاك علشان أعالج الماضي.
- كل الناس عندها ماضي..!
كل الناس اتألمت، عندها مشاعر حزينة، مشاعر مؤلمة جاية من صدمات- خيانة- إيذاء جسدي من و أحنا صغيرين و بقالنا 30-40 سنة مش عارفين نشفي نفسنا من هذا الإيذاء اللي حصلنا من و أحنا صغيرين.. الماضي مليان مشاكل كتير. فكلنا عندنا نفس المشكلة لكن زي ما قولت إن في ناس بتكمل و في ناس بتقف في مكانها.
- الماضي مش بيتنسي..!
يعني في كتير من الناس يقولوا “الأيام هتخليني أنسى الماضي..” . للأسف أحنا بنحاول ننسى الماضي و بنحاول ننسى التجاب اللي مررنا بيها، فتلاقي عقلك بيخليك تنسى كل حاجة أسمك/ قرايبك/ مواعيدك.. و تفتكر فقط الموقف اللي مش عايز تفتكره ومش عارف تنساه.
فالماضي مش بنتعامل معاه من خلال النسيان أحنا لازم نعالج الماضي.
طيب إزاي أحنا ممكن نتعامل مع الماضي؟
*الخطوة الأولى: الأحساس و مواجهة المشاعر المؤلمة.
لأن كل ما بتحاول تهرب منها كل ما هي بتجري وراك.. أنا لازم أواجهها و أحس بها.
يعني أنا عايز أهرب منها وأنت بتقولي حس بها !!
لأنك لو ماحستش بالمشاعر المؤلمة دي كاملة أنت مش هاتتحرر من الماضي.
فا نعمل أيه ؟ ورقة و قلم وأكتب تفاصيل الموقف اللي أنت مش قادر تنساه. أكتب التفاصيل(كنت فين،لابس أيه، كان مين معاك، كنت بتتصرف إزاي، أيه اللي حصل، كانت أيه توقعاتك، كان نفسك يحصل أيه وماحصلش، كان نفسك ما يحصلش أيه، مين الناس اللي أثروا فيك جامد،….).
و بعد ما تكتب تفاصيل الموقف ده، أكتب مشاعرك ( أنا غضبان، متضايق، جوايا نار، نفسي أنتقم من الشخص ده او حتي أنتقم من نفسي لو مش قادر أسامح نفسي،..).
-اكتب أنا غضبان بسبب و ابدأ اكتب اللي أنت غضبان بسببه..
-اكتب أنا حزين لأن ( فلان عمل كده، مش عارف أتخلص من الموقف ده بقالي سنين طويلة، لازال أحس بنفس المشاعر..).
-اكتب أنا خايف جدًا ( لأن اتحطيت في موقف رهبة شديدة جدًا، إن الموقف ده مقدرش أتخلص منه، من التعامل مع ناس جديدة بسسب الموقف ده.. ).
-كمان اكتب أنا أسف ( لأن ما أخدتش بالي، لأن أنا عملت كده، لأن سمحت للناس تعمل كده، أنا نادمان علي كل الحاجات اللي حصلت قبل كده… ).
-اكتب كمان أنا عايز أيه..( أنسى الموقف ده خالص، لما أفتكر الموقف ده مايكنش بيأثر عليا، أعيش حياة سعيدة، أدخل تجارب جديدة..).
– كمان في الخطوة دي بتكتب أنا مسامح..( الناس دي بالرغم الألم اللي سببوه ليا.. أنا عارف إن ده ممكن يكون صعب علي كتير من الناس. إن أنت تسامح ، أكتب أنا مش قادر أسامح الشخص اللي.. جرحني، أهانني ، أذاني جسديًا…)
أنا بس عايز إنك تعمل الخطوة دي لو أنت فعلًا عايز تصلح و تتخلص من الماضي أكتب أنا مسامح نفسي أو مسامح الآخرين.
*الخطوة الثانية: أيه الدرس اللي أنا اتعلمته؟
الناس اللي بتتقدم في حياتها و بتنطلق رغم إنهم ممكن يكونوا مروا بمواقف أصعب من اللي أنا مريت بيها في حياتي..! الناس دي أتعلمت الدرس. الناس دي حولت التجارب المؤلمة إلي درس قادرين يعيشوا بيه في الحياة و يساعدوا الآخرين بيه.
فا اسأل نفسك أيه الدرس اللي أنا اتعلمته، أيه اللي أكتشفته في نفسي/ الآخرين، أيه اللي اكتشفته عن الحياة، لو عاد بيا الزمن مرة تانية أو في حد ممكن يتعرض لنفس الموقف ده أنصحه بأيه، أنصح نفسي بأيه…؟!
الخطوة الثالثة: تحييد المشاعر السلبية
و دي جزء من البرمجة اللغوية العصبية. تفكيرك في أي ذكرى بيكون علي شكل أيه!
لو أنت فكرت في أي ذكري أيجابية/ سلبية.. هتجيلك في شكل من الـ3 أشكال:
- صورة.
- صوت بتسمعه جواك.
- أحساس.
فكر كده في اي موقف مريت به في حياتك وغمض عينك و افتكر الموقف هتلاقي حاجة من الـ3.
و كمان عايز أقولك الصورة دي مش موجودة بشكل أعتباطي كده دي موجودة في مكان ما
يعني لو سألتك و أنت مغمض عينيك الصورة موجودة علي يمينك و لا علي شمالك و لا فوق ولا تحت و لا قدامك؟ غالبًا المواقف اللي أحنا مش بنقدر ننساها بتبقى قدامنا.
و لو سألتك الصورة دي أبيض وأسود ولا ألوان؟ غالبًا بتبقى ألوان لأن أنت عايش الموقف كأنك عايشه، الصوت ده كأنك سمعه بالظبط في صوت بيزن في وداني هو صوت الشخص ده أو صوتي أنا أو صوت الناس اللي كانوا حواليا، أحساس موجود في حتة معينة.
فهو ده الجهاز العصبي اللي بيخزن الذكريات بطريقة معينة و لو أنا فهمت الطريقة دي أقدر أتعامل مع هذه الذكريات.
*نعمل أيه؟!
عايزك تفكر في أقوي موقف إيجابي أنت مريت بيه في حياتك قبل كده.. النجاح، إنجاز فخور به، موقف مع أولادك/ أصحابك كنت فرحان فيه، سفرية عملتها و كنت مبسوط…
غمض عينيك و فكر في الموقف ده و افتكر كنت.. لابس أيه، مع مين، ماشي إزاي، بتفكر إزاي، بتقول أيه لنفسك، الناس كانت بتقولك أيه..
و عيش الموقف ده كأنك عايشه حالًا دلوقتي حس المشاعر الإيجابية، السعادة، الثقة، النجاح.. و أنت مغمض عينيك تخيل أنت حطيت الموقف ده كأنه فيديو موجود علي كف أيدك اليمين و هافتح كف أيدي الشمال و أنا مغمض و احط فيه صورة أبيض وأسود للموقف السلبي.
و كل اللي أنت هتعمله هتنتقل بوعيك من المشاعر الإيجابية و تروح باصص علي الموقف السلبي لحظات كده و ترجع تاني تقف عند المشاعر الإيجابية وتعيش فيها و تحسها في جسمك و بعدين تروح باصص بصة سريعة علي الموقف الموجود في كف أيدك الشمال
( بتعمل ده وتنتقل من الإيجابي إلي السلبي تقريبًا 6 – 7 مرات بسرعة جدًا بين كل موقف ).
*انا عارف إن دي ممكن تكون تقنية غريبة بالنسبالك ولكن صدقني بتجيب نتائج سحرية أنت مش متخيلها. و أكبر دليل علي كده قبل ما تعمل التجربة دي أعمل مقياس الألم من 1 إلي 10 أنت قد أيه متألم من التجربة الماضية اللي أنت مش عارف تنساها و بعد ما تعمل التجربة دي قيس نفسك مرة تانية و شوف هل بقت 8، 6 ، 5 ، 1 وأنا بأكدلك إنك بعد التجربة دي هتسأل نفسك هي المشاعر السلبية راحت فين اختفت تمامًا و لا هترجع تاني انا بأكدلك أنها أختفت للأبد*
الخطوة الرابعة: اشغل عقلك بالأهداف والتحديات
لأن طول ما عقلك فارغ من الأهداف و التحديات هيجيب مواقف من الماضي
فا ضع تحدي جديد في حياتك دراسة جديدة، لغة، مهارة، كورس… و هابدأ اركز كل تركيزي في الوقت الحاضر على إنجاز هذه الأهداف الجديدة مع وجود خطة لها ماشي بها يوم بعد يوم علشان توصل لأهدافك و تتخلص تمامًا من الماضي. حول الماضي إلي مدرسة و افتكر دايمًا إن الماضي لا يساوي المستقبل، أحنا دايمًا بنتأثر بالماضي و بنخليه يأثر علي كل تصرفاتنا و قراراتنا. لازم نتصالح مع الماضي.
