المشكلة دي بتتكلم علي موضوعات كثيرة جدًا لها علاقة بتقدير الذات والثقة بالنفس والمفهوم الذاتي و رأي الآخرين فينا والانتقاد ..هنتناولها في اكثر من نقطة .
اولًا: المفهوم الذاتي
المفهوم الذاتي من اقوي الاشياء اللي لازم تاخد بالك منها وكمان تظبط المفهوم الذاتي عن نفسك ويكون مرتبط بنفسك وليس الاخرين .
مفهوم الذات هي فكرتي عن نفسي انا شايف نفسي ازاي! و في المشكلة مفهوم الذات مرتبط برأي الآخرين وده ممكن يكون ناتج عن التربية وأساليب التربية. وده يخلينا ناخد بالنا وأحنا بنربي أولادنا انه المعيار لسلوك أولادنا ميبقاش هو راي الناس فينا يعني تلاقي الأم والأب بيسألوا: “انت جبت كام علشان الناس هتقول علينا أيه ،انت عملت أيه، الناس هتاخد بالها من أيه ،الناس هتقول بنتي بتعمل كذا..” فااحنا خلينا مفهوم الذات عند الطفل مرتبط بالاخرين ، و يبقى لو الناس مدحتني أنا هبقي مبسوط جدًا ، لو الناس انتقدتني أنا هبقي مُحبط جدًا.
كل واحد رابط المفهوم الذاتي برأي الآخرين. انت كأنك عطيت المفتاح لطفل راكب اسانسير و الطفل ده عمال يطلع فوق وينزل تحت فا أنت علي طول في حالة من عدم الرضا عن نفسك.
ثانيًا : تقدير الذات والثقة بالنفس
دايمًا اللي عندهم تقدير ذاتي منخفض و ثقتهم بنفسهم قليلة وعندهم احساس بالنقص قد يكون مش عاجبه شكله، ادائه، مش راضي عن نفسة، شايف الناس احسن منه…
ده كمان مرتبط بالتربية وهي فكرة المقارنة ان انا اقارن أولادي بحد تاني فالمعيار علي طول موجود عند الناس اللي برة. فكرة المقارنة كمان بتخلي عندي احساس بالنقص وعدم الثقة بالنفس ، اذن لازم تكون عارف ان تقديرك الذاتي مش لازم يكون معتمد علي رأي الآخرين والثقة بالنفس عندك لازم تكون مرتفعة .
*ازاي يكون عندي ثقة بنفسي غير معتمدة علي رأي الآخرين ولكن تكون معتمدة عليّ..؟
1-يكون عندي ايمان ان ربنا خلقني من أجل هدف وغاية مهما كانت حالتي ومهما كان شكلي وطولي ولوني …الخ. و ممكن نكون لسه مش عارفين الهدف لحد دلوقتي ولا الغاية ، لازم تحط في دماغك ان ربنا مش خلقك بشكل عشوائي “أنا مصدق إن ربنا خلقني أنا مهم وربنا خلقني علشان مهمة ورسالة في الحياة”.
2- ربنا لما خلقني وهبني كل القدرات اللي محتاجها علشان اقوم بالمهمة اللي انا خُلقت من أجلها .
3- استخدم القدرات والإمكانيات لخدمة الاخرين هنا هتبان قيمتي الحقيقية انا بقدم أيه للآخرين.
اذن انت متربطش مفهوم الذات برأي الآخرين و زود ثقتك بنفسك مش هتبقى حساس برأي الآخرين ، كمان انت بتقول انك دايمًا دمك خفيف ولكن لابس قناع. اللي بيحصل هنا ان كتير من الناس بيحاول يظهر قدام الناس والمجتمع بقناع و ذات مزيفة و ليست حقيقية دايمًا بيحاول يحمي الذات و مايدخلش في اي حاجة ممكن تهدد الذات اللي هو بناها وعايز يظهرها قدام الاخرين فامثلا : بعض الناس بتخاف تعمل فيديوهات علشان الانتقادات اللي بتيجي في الكومنتس فا هو عايز يحمي نفسه من الناس، ممكن بعض الناس متقولش افكارها ولا معتقداتها الدينية أو السياسية علشان مايتوجهش له انتقاد وبالتالي يكون بيحمي الذات،ممكن يكون من جواه عايز يشتم و جواه غل بس بيسكت علشان يحمي الذات اللي بناها قدام الناس…
نصحيتي ليك
1- ان اي حاجة بتفكر فيها علشان تعملها وتحمي ذاتك توقف عن ان انت تعملها .
2- الناس الناجحين هي الناس اللي بتبقي علي طبيعتها علشان تكسر الذات المزيفة اللي بتبنيها قدام الناس ( هتقولي بس انا مش بقدر اتحمل الانتقادات ) هقولك انك لما هتزود ثقتك بنفسك وتبقي عارف ان رأي الناس فيا مش أهم من رأيي في نفسي لان انت استحالة هترضي كل الناس ، انا نفسي احيانا لما بعمل فيديوهات برجع بعد كدة القي انتقادات ببقي مش قادر افهمها وببقي عايز افهم الانتقاد علشان اقدر اطور من نفسي لأن انا بتعامل مع اي انتقاد علي ان انا قدامي حاجتين يا الانتقاد ده حقيقي أو مش حقيقي. لو الانتقاد ده حقيقي باخده بعين الإعتبار وبفكر فيه واحاول اطور من نفسي ، لو الانتقاد ده مش حقيقي مابهتمش به اصلًا .
طب انا بعرف منين انه حقيقي او مش حقيقي ؟
من تكرار الأنتقاد. يعني أنا مثلًا نزلت فيديو ولقيت ناس كتير بتقول نفس الكلام اذن اه يبقى ده أنتقاد حقيقي ده مش حد متضايق مني ولا هو عنده مشاكل نفسية بيعكس مشاكله عليك، لكن لو لقيت انتقاد واحد من وسط مائة ده عادي لأن عمرك ما هترضي كل الناس، و ده من حكمة ربنا ان انت بتتفرج عليا وفي ناس بتتفرج علي حد تاني وهكذا.
فاانت مش هترضي كل الناس ومتشغلش بالك اصلا بهم ، وديما امشي بمقولة ( رأيك فيا مش أهم من رأيي في نفسي ).
ثالثًا: المنافسة :-
المنافسة احيانًا بتكون مفيدة لما بتديني دفعة.
و بتكون مفيدة لوقت ولكن بعد كده مش بتكون مفيدة خالص ليه ؟
انا دلوقتي مثلًا معايا مليون جنية و لما هقابل الناس اللي اقل مني هاحس إن أنا جامد جدًا ولما هقابل الناس اللي معاهم مليارات هاحس إن أنا صغير اوي ، أو انا دلوقتي جميلة وهقابل ناس اقل مني جمالًا هاكون حاسة بالثقة لكن لما هامشي واشوف بنات أجمل مني هاحس ان انا وحشة..
فابالتالي المنافسة شئ سئ جدًا للأسف وللأسف أحنا معظم ثقافتنا مبنية علي المنافسة. و لكن هي فكرة التعاون و ان احنا بنكمل بعض. كل واحد فينا عنده ميزة وعنده موهبة وحتي لو نفس الموهبة بيكون في سمة مختلفة من واحد للتاني سبحان الله ربنا خالق مليارات الناس وكل واحد عنده موهبة مختلفة عن التاني، فالمنافسة الوحيدة والمقارنة الوحيدة اللي ينفع تقارن نفسك بيها ان انا امبارح كنت فين وانا انهاردة فين وانا بكرة فين و يبقى انت كده ريحت نفسك وبتطور من نفسك. وانسي خالص فكرة المنافسة مع الاخرين أنا مش بنافس حد لأن ربنا أعطي لكل واحد قدراته و رسالة هو بيقوم بها .
ممكن اعمل اية في المنافسة ؟
كل واحد فينا عنده قدوة أو معجب بشخصية معينة في مجال ما.فا ابدأ أشوف الشخصية دي بتتصرف إزاي واحطها قدوة بالنسبالي واخد القيم والاخلاق بتاعتها واخد العلم الموجود عنده واشوف المصادر اللي بيجيب منها.. هنا انا واخد الشخص ده قدوة بالنسبالي لكن انا مش داخل في اي نوع من انواع المنافسة بيني وبين اي حد ، ما تدخلش في منافسة مع اي حد لان المنافسة هتتعبك ودايمًا هتلاقي حد أحسن منك , اجمل منك , اغني منك , اكثر معرفة منك.. فا أنت علي طول هتكون في حالة أحباط.
* كمان أنت ذكرت نقطة مهمة جدًا وغالبًا هي اللي بتخوفك من الانتقاد. أنت بتقول أنا دمي خفيف خلي بالك اوعي يكون دمك خفيف ان انت بتتنمر علي الاخرين وبالتالي الناس بتضحك بس اللي انت بتتنمر علية مش بيكون مبسوط وانت بتكون خايف يتعمل فيك ده. فاارجوك لو انت واحد من الناس اللي بتتنمر علي الاخرين و دي حاجة من وجهة نظرك بتحسها خفة دم توقف تمامًا لأن ده بيجرح الناس اللي حواليك وبيخليك لا شعوريًا خايف ان حد يتنمر عليك.
* و تدخلك في مجالات كتيرعلشان تبان ان انت الخبرة في كل حاجة، عندنا مثل مصري بيقول ( سبع صنايع و البخت ضايع ) الناس اللي بتعرف حاجة عن كل حاجة دول انت لا تثق فيهم. تخيل ان انت جايب واحد صنايعي في البيت وبتقوله النقاشة يقولك تمام انا عندي فكرة عن النقاشة طب الكهرباء يقولك تمام انا شغال في الكهرباء و انا عندي فكرة في السباكة… اعرف علي طول ان هو مش محترف في اي حاجة .
الزمن اللي احنا فيه دلوقتي يتطلب المعرفة العميقة. ان انت تاخد مجال واحد بس وتبدأ تبحث فيه بعمق و تحفر فيه بعمق وتجيب اخره فا تبقى خبير في هذا المجال. يعني انا شخصيا في حاجات كتير جدا انا معرفهاش ولا احب ان انا اعرفها لان انا لما هحتاج الخدمة دي هروح لمتخصص.
فا أنا مش هيفرق معايا اعرف مكونات الكمبيوتر ولا تفاصيله ممكن اعرف بعض الاشياء اللي تشغلني لكن العمق فيها ميفيدنيش بحاجة هيضيع وقتي وفي النهاية مش هكون متخصص فيه ولا حاجة. ان انا اعرف بعض المعلومات مثلا عن الجرافيك لكن انا مش متخصص في الجرافيك ، اعرف بعض المعلومات عن التسويق الالكتروني ولكن انا مش متخصص في التسويق الالكتروني وهكذا لكن انت تكون متخصص في مجال واحد فقط هو ده اللي هيخليك تقدر تنجح .
* ملخص حل هذة المشكلة :
1-متربطش مفهومك الذاتي برأي الاخرين.
2- اشتغل علي الثقة بالنفس والتقدير الذاتي المرتفع.
3- اكتشف غايتك من الحياة و رسالتك في الحياة.
4- اوعي تقارن نفسك بالآخرين لأن المقارنة والمنافسة مش في صالحك.
5- حدد هدف واحد وتعمق فيه واشتغل عليه علشان تكون واحد من الناس الناجحين.
