موضوع الشخصية النرجسية ده صعب لأننا بنتكلم عن شخصية من الصعب جدًا إنك تعيش معاها، و لو أنا عندي فرصة إن مرتبطش بهذه الشخصية فمن الأفضل مارتبطش بها او اتعامل معاها او أن ان اتعامل معاها في أضيق الحدود.
في الأول عايز اتكلم عن اضطرابات الشخصية و ما هي الشخصية بشكل بسيط لأنك كل ما عرفت معلومات عن الشخصية و إزاي الشخصية بتتكون و أيه الشخصية اللي أنت بتتعامل معها هتعرف تتعاملها بسهولة. مش بسهولة أوي يعني و لكن هيبقي عندك مفاتيح تقدر من خلالها مع الشخصية.
- الشخصية ببساطة جدًا هي عبارة عن مجموعة سمات جسمانية، انفعالية، عقلية، اجتماعية اللي أنا بكتسبها خلال التربية واللي بتميزني عن حد تاني و علشان كده في التعريف ده محدش عنده شخصية كلنا عندنا شخصيات لكن ممكن الشخصية دي تكون فيها مشاكل.
و في علم النفس و علم الصحة النفسية بنقول إن الشخصية إما أن تكون سوية أو غير سوية .
الشخصية السوية هي متوافقة مع نفسها و مع الآخرين. سعيدة بنفسها عارفة أمكانياتها، قدراتها، نقاط ضعفها و نقاط قوتها. بتقدر تتعامل مع الآخرين و تحس بيهم و بمشاعرهم. و كمان من ضمن مميزات الشخصية السوية إنه يسعي لتحقيق أهدافه بيعرف يتعامل مع تحديات الحياة هو إنسان راضي عن نفسه و بيطور من نفسه هو إنسان إلي حد كبير متوافق أجتماعيًا و نفسيًا و مهنيًا و تعليميًا هو قادر يتوافق مع البيئة اللي حواليه. ولكن في حاجة تخلينا نفكر في نفسنا وهي إن الشخصية السوية خالية من الأمراض والإضطرابات النفسية و ده معناه إن مفيش حد فينا سوي بنسبة 100% و لكن هي نسب.
أما الشخصية الغير سوية عندها إنحراف من المشاعر، الإنفعالات، الإدراك و السلوك و ممكن يكون عندها عدم توافق شخصي، مهني و أجتماعي.
فأحنا بنقول إن اضطرابات الشخصية هي مجموعة من الأضطرابات منها اضطرابات الشخصية النرجسية ( و ده من أصعب أنواع الأضطراب حتي في العلاج ) علشان كده علاج الإضطراب ده هو علاج معرفي، سلوكي ، تحليلي. بيقبى مع الإستشاري النفسي وده بياخد وقت علشان نغير هذه الأفكار و يطلع بالنهاية بتعديل هذه الشخصية، و لكن المشكلة إنه بيكون مش مُعترف إنه أصلًا عنده مشكلة و بتالي هو نادرًا علي ما بيروح لدكتور لأن هو دايمًا شايف إن الناس هم اللي عندهم مشكلة.
هل لو أنا زوجي مغرور أقول عليه إنه شخصية نرجسية؟
= لأ ، في عندنا سمات كتير محتاجين نقف عندها علشان مش أي شخص مغرور نقوله عليه شخصية نرجسية.
- الشخصية دي بتقول: أنا هنا يا جماعة، أنا عظيم جدًا، أنا كُفئ جدًا، أنا رقم 1 ، أنا مفيش حد زيي خالص يعني. فهو مُعجب جدًا بنفسه و بيحب نفسه حب أناني جدًا.
- هذا الشخص بيتفاخر بممتلكاته، مواهبه، قدراته و علاقاته. فهو بيتفاخر بكل اللي بيعمله جدًا بل بالعكس كمان ده ممكن ينسب إنجازات الآخرين لنفسه. يقولك: ” بص مراتي هي نجحت علشان أنا اللي كنت بدعمها ، أولادي دول ناجحين لأن أنا كنت السبب و أنا اللي فكرتلهم و عملتلهم و أنا اللي عملت الشركة دي…” هو بينسب كل المجد لذاته إن هو السبب في هذه الإنجازات.
- من العيوب الخطيرة جدًا في هذه الشخصية إنه بيستغل الآخرين من أجل الحصول علي ما يريد. لا يهتم برأي الآخرين و لا بمشاعرهم، بيقلل من شأن الآخرين، بيستخدم الآخرين كأشياء علشان يوصل للي عايزه.. هو شخصية لا يعترف إلا بنفسه فقط.
- هو عايش في خياله. هو بيمجد ذاته و عايش في خيال إنه جميل، قوي ، مفيش حد زيه، بيهتم جدًا بتفاصيل لبسه و شعره بيعمل حاجات غريبة جدًا و يقدر قدام المرايا كتير و يشتري الBrands علشان يظهر قدام الناس و ده بيخليه قدام بعض الشخصيات الضعيفة من النساء هو جذاب. جذاب و عنده قدرة كبيرة جدًا علي الإقناع والجدال فهو متكلم جيد. و علي فكرة اللي بيوقعِك في شرك هذه الشخصية إنه بيمدحك بزيادة وهو بيختار الشخصيات الجميلة و الناجحة و يكسر فيهم و يضعفهم علشان دايمًا يكون هو المسيطر عليهم السيطرة دي هي اللي بتحسسه بالذات. فهو بيلعب لعبة إنه يشد ويرخي فالفريسة بالنسباله ييفضل فترة كده يقولها كلام ماسمعتهوش قبل كده و ده بيشبع عندها إحتياجات بتبقى غالبًا الشخصية اللي معندهاش ثقة في نفسها ولا تقدير ذاتي فبتوقع فريسة للشخص ده. فهو بيعطيها جرعة كبيرة جدًا و بعدين مع أي مشكلة يختفي فهي تبدأ تحس إنها عملت حاجة غلط و لما يرجع يبدأ إنه يأنب و يلوم ويحسسها إنها قصرت و أخطأت جامد فتقدم فروض الولاء فيرجع يعطيها جرعة تاني من الأهتمام و المشاعر و بعدين يقسي عليها تاني… و هكذا تستمر العملية دي. فهو دايمًا محافظ علي إنك جوة العش النفسي بتاعه من خلال أستخدامه الذكي للمشاعر و المدح و بعدين يرجع يسحب ده فتحسي إنك قليلة و هكذا. بيقلل من شأنك جدًا لو أنتِ دخلتي في علاقة مع هذا الشخص بيدمرك و يدمر مشاعرك. بتجيلي زوجة تقولي ” قبل الجواز أنا كنت بشتغل و كنت ناجحة، كان عندي خدمة أجتماعية و عندي تطوع… أنا النهاردة أنطفيت حاسة إن أنا مابقتش أنا و مش واثقة في نفسي، كل ده ضاع و مش عارفة أقوم من الواقعة اللي وقعت فيها.
- إن هو مابيعرفش يسامح و بيفضل وراك لحد ما ينتقم منك.
- بيحس إن كل الناس بتحسده يا حرام لإن هو عايش في المجد و متفرد. فتبدأ علاقاته تنهار و يبدأ يكون قاعد لوحده عامل Bubble كده و عايش جواها و مفكر كل الناس بتحسده و هو كمان بيحسد الآخرين بيحسد أي نجاح لأي حد في الدنيا لإنه شايف إن هو من يستحق هذا النجاح مش حد غيره.
- بيحب يكون الأفضل في كل شيء. هو مختلف عن الآخرين توقفني أنا في طابور مثلًا أنت ماتعرفش يابني أنا مين أنت ماتعرفش علاقاتي متعرفش أنا بعمل أيه أنا ماينفعش أقف زيكم كده زي باقية الرعاع بتوع الشعب يعني. أنا عايز أفضل حاجة أفضل عربية، شقة، لبس.. لدرجة إن كتير من الزوجات اللي بيلبسوا شخص نرجسي وهما بيكون معاهم فلوس الشخص النرجسي ده بيقنعهم إنهم يبيعوا أشياء علشان هو يركب أفضل عربية ويلبس أفضل بدلة و يقعد في أفضل فيلا. هو بيقدر يستغلهم علشان يحقق طموحاته اللي هو شايف إنه يستحقها.
- من ضمن الحاجات اللي بيعملها مع الزوجة إنه بيسوء سمعتها، دايمًا بيتهمها، بيقلل من شأنها، بيجيب سيرتها عند قرايبها، بيطلعها هي الغلطانة ممكن يفتري عليها و يختلق قصص و يخليها تشك في نفسها و يقول حاجات محصلتش و يقولها دي حصلت… يعني هو بيدمرها.
*أسباب الشخصية النرجسية :
الأسباب من وجهة نظري، في نظريات كتير لكن تحديدًا أيه السبب محدش عارف. و لكن أنا شايف من وجهة نظرتي و من خلال خبراتي و تعاملي مع الأطفال و الأباء و الأمهات إن :
- الطفل المدلل بزيادة واللي بمدحه كتير رغم إنه ماعملش حاجة و مابربطش هذا المديح بأفعال بمدحه هو “أنت نابغه، أنت ذكي ، أنت ماحصلتش أيه الجمال اللي أنت فيه ده…” فده بيحسسه إن هو مختلف عن الآخرين.
كمان إن أقوله ” أنت أحسن من كل الناس، أنت لازم تتفوق علي المدرسة كلها، أنت حد متميز، أنت مفيش زيك …”. ده كله ممكن يكون جذور لهذه الشخصية.
- و أحيانًا يكون العكس تمامًا. الإهمال و الفقر و عدم الأهتمام و معاملة سيئة فهو عايز يطلع يعوض اللي حصله في الماضي.
*نتعامل إزاي مع الشخصية النرجسية :
لو أنا مضطر إن أنا اتعامل معاها لكن لو قدامي الإختيار إن أنا أسيبه ده أختيار هيكون أفضل. نتعامل معاه إزاي..
الأتجاه الأول: نستقل عنه نفسيًا.
يعني حضرتك لا تتجدالي معاه لإن هو هيكسب الجدال و مش هتقدري عليه في النهاية هتنفجري.
ماتدخليش معاه في هجوم لأنك لما هتهاجمي هو هيهاجم بطريقة بشعة أو أستخدام ألفاظ و أتهامات و حاجة انتِ مش هتعرفي تردي عليها.
ماتبينيش إنك منهارة ومادافعيش عن نفسك لأنك مش متهمة.
كوني باردة في إنفعالاتك معاه ” قول اللي أنت عايزه، أنت شايف كده تمام خلاص، أنا غلطت في حقك؟ أه تمام أنا غلطت في حقك هاخد بالي المرة الجاية” فأنا وش خشب مش هابينله اي إنفعالات و مش هادخل معاه في جدال ومش هدافع عن نفسي من الإتهامات بتاعته.
حاجة مهمة جدًا أعملي حدود بينك و بيننه، لما يتطاول عليكِ قوليله “لو سمحت أنا مابقبلش الطريقة دي في التعامل، لو سمحت أنا مش عايزاك تغلط فيَ مرة تانية، لو سمحت أيدك ماتتمدش عليا مرة تانية و لو ايده اتمدد عليكِ لازم تدخلي حد..” لازم يكون في حدود في التعامل معاكِ. أنا عارف إن الموضوع ده ممكن يكون صعب لأن أنتِ ماتدربتيش عليه و بالأضافة إنك عندك أحتياج عاطفي لإن هو شاطر جدًا إنه يحسسك في يوم من الأيام إنك ملكة و في يوم من الأيام إنك خدامة. فأنتِ عندك أحتياج عاطفي أو جنسي له فأنتِ صعب إنك تنفصلي عنه لكن أنتِ بتشتري حياتك و حياة أولادك فأنتِ لازم تنفصلي عنه عاطفيًا ونفسيًا و معنويًا.
الاتجاه الثاني: تنمية الذات
لازم أنمي نفسي لأن الشخصية النرجسية بتاكل الشخصيات الضعيفة.
فأنا لازم أفتكر نجاحاتي. لأني محتاج ثقة بالنفس و تقدير ذاتي عالي. محتاج إن أسترجع تاني إنجازاتي وانتصاراتي و شخصيتي اللي كل الناس بتنبهر بيها يعني.. أنا محتاج أسترجع هذه الشخصية مرة تانية، محتاج أقدر نفسي تقدير عالي اعرفي أمكانياتك و قدراتك، حطي أهداف لنفسك واشتغلي عليها، ركزي علي أولادك ، ركزي علي تنمية ذاتك.. علشان أنا كل ما بقوي في شخصيتي هو مش هايقدر يعمل معايا حاجة.
و أرجع و أقولك لو لسه مرتبطيش بالشخص ده و قدامك لسه فرصة متربطتيش بيه أهربي لأن هذه العلاقة صعبة جدًا .
اتمني إن أكون قدرت بسرعة اعرفكم إزاي نتعامل مع الشخصية النرجسية، واتمني إن لو في حد نرجسي أكتشف نفسه يلجأ سريعًا للعلاج علشان في النهاية تقدر تسيب ذكرى طيبة عند الناس اللي أنت بتتعامل معاهم و إن أنت تكون إنسان سوي لأنك أول واحد هتبقى سعيد لما تكون إنسان سوي.
