يا كتور بنتي عندها 8 سنوات و لسه بتتبول أثناء النوم دلوقتي بتلبس البامبرز لوحدها قبل ماتنام و متفقين ان ده سر بنا، لكن أختها عارفة و هي عارفة بس بتيجي تقولي أنا هالبس اقولها ماتخليش حد يشوفك و بتكلم معاها كتير براحة جدًا .

مش عارفة أعمل أيه في موضوع التبول ده و هي كل ما تجرب تخلع البامبرز بالليل تعمل فتزعل جدًا و تقرر تلبسه تاني، هي بتتأثر اوي و تقعد تقولي نفسي ماعملش تاني. وأنا بقولها أنتِ اصلًا شاطرة و أوقات بتقومي بالليل لوحدك و تعملي أنتِ بس ركزي .. بس هي نومها تقسل جدًا حتي أنا لما بقومها بالليل مابتحسش. أعمل أيه يا ريت حضرتك تفيدني.

الزوج ذو الشخصية النرجسية اللي دايمًا شايف نفسه مش بيغلط و حتي لو غلط شايف إن اللي قدامه لازم يستحمل و يعدي علشان مايزعلش.. و لو الطرف الآخر غِلط غلط بسيط مهما يعتذر له مايسامحش و يفضل يلومه إنه إزاي يزعله!!

إزاي الزوجة تستحمل العتاب المستمر في كل اللحظات لأنها عايزة البيت يستمر.. تعمل أيه؟!

انا عندي خوف من انه يكون شكلي وحش بين جماعة او زمايلي في الشغل . بكون طول الوقت قاعد في حالي اللي بيكلمني برد عليه غير كده مش بفتح موضوع مع حد خوفًا من إنه يتريق عليا و يبقى شكلي وحش . مع اني شخص كوميدي وبهزر كتير الا اني ببقي مع اي حد غريب لابس قناع الجدية والرسمية في المعاملة . بخاف كمان حد يتفوق عليا  لاني شخص بيحب المنافسة وبحب اكون الشخص الوحيد الفاهم والمتفوق والكل يطلب مني خدمة من باب خبرتي في اي مجال . ف تولد عندي شعور اني لازم اكون عندي خبره في جميع المجالات سواء تهمني ام لا . خلاني هذا الشعور بعيد عن هدفي الاساسي وشاغل حالي بمحلات لا بحبها ولا مرتاح وانا بشتغل فيها .

إزاي أبطل أفكر في مواقف حصلتلي من زمان..؟ أنا قرأت عن المشاعر المخزنة و بعمل تأمل بيساعدني شوية، محتاجة حاجة تساعدني أكتر مع التأمل.

أبني الكبير 14 سنة عنيد، مش بيسمع الكلام، مش بيحب أخوه الصغير وبيضربه، معندوش ثقة بنفسه و قرارته مهزوزة و مش بيقبل نصيحة حد… انا أحيانًا بتكلم و أحيانًا بضرب لما بحس ان الكلام مش جايب نتيجة. أنا عايزة أعامل أولادي كويس و بندم اني بضربهم بس مش عارفة اعمل أيه عايزة خطوات أمشي عليها، لأن اخوه الأصغر منه بيقلده..!! و الجديد ان ابوه مسافر و جابله موبايل و اكتشفنا انه استخدمه استخدام خاطئ و سحبناه منه. بدأ يكلم ابوه بأسلوب مش كويس و بيعلي صوته. انا قومت ضربته و قولتله ادخل اوضتك و بعد وقت لما سألته اللي أنت عملته ده صح و لا غلط قالي انا هانام و مش عندي حاجة أقولها.. انا خايفة أخسر أبني خاصة إنه ما بيعرفش يختار أصحابه .. مش عارفة أعمل أيه!

أبني الكبير لقيته كاتب في مذكراته إنه بيحب بنت زميلته في المدرسة و إنه عاوز يتجوزها لما يكبر، ما عرفتش اتصرف إزاي مع الموضوع ده.. أنا حاليًا ماقولتش لأبني إن قرأت المذكرات.. ممكن تنصحني اتصرف إزاي !! هو عنده 10 سنوات و عنده إبتدائية هذا العام .